• 

👩‍🏫 „ბავშვმა უნდა იგრძნოს, რომ ის მნიშვნელოვანია და უყვართ ისეთი, როგორიც არის’’. შალვა ამონაშვილის ეს აზრი განსაზღვრავს ჩემს დამოკიდებულებას პედაგოგიური საქმიანობის მიმართ. უკვე მრავალი წელია ვმუშაობ სხვადასხვა ასაკის მოსწავლეებთან და მუდმივად ვცდილობ, ჩემი ცოდნა და მიდგომები განვაახლო, რათა მათ მაქსიმალურად საინტერესო და ეფექტიანი სასწავლო გარემო შევუქმნა.
სკოლაში ჩემი მთავარი ამოცანაა მოსწავლეებს შევუქმნა ისეთი გარემო, სადაც ისინი შეძლებენ სრულფასოვან განვითარებას, არა მხოლოდ აკადემიური მიმართულებით, არამედ – პიროვნული. განსაკუთრებულ ყურადღებას ვუთმობ მოსწავლეებში დამოუკიდებელი აზროვნების, კრიტიკული ანალიზისა და შემოქმედებითი უნარების განვითარებას. აქტიურად ვნერგავ ჰუმანური პედაგოგიკის პრინციპებს, რომლებიც ორიენტირებულია ბავშვის პიროვნებაზე, მის შინაგან სამყაროზე. მასწავლებელი არ არის მხოლოდ ცოდნის მიმწოდებელი, არამედ ის არის მეგობარი და დამხმარე, რომელიც მოსწავლეს ეხმარება საკუთარი პოტენციალის აღმოჩენასა და რეალიზებაში.
✨ ასევე მომწონს და ვიყენებთ ფინური სწავლების მოდელს, რომელიც თანასწორობაზე, სტრესის შემცირებაზე, თამაშით სწავლებასა და ცოდნის პრაქტიკულ გამოყენებაზეა ორიენტირებული. ორივე მიდგომა ბავშვის ინდივიდუალურ განვითარებასა და კეთილდღეობას აყენებს ცენტრში.
ჩემთვის მასწავლებლობა უდიდესი პასუხისმგებლობაა, ამავე დროს, ბედნიერებაა, იყო თანამონაწილე პიროვნების ჩამოყალიბების პროცესში. Მოსწავლეებთან კომუნიკაცია ჩემთვის ენერგიის წყაროა. მათგან ვიღებ ახალ იდეებს, მოტივაციას და შთაგონებას. თითოეული მოსწავლე არის უნიკალური სამყარო თავისი ინტერესებითა და ხედვებით. Მათთან ურთიერთობა მეხმარება მუდმივ განვითარებაში.
🤍 Ჩემმა მოსწავლეებმა უამრავი რამ მასწავლეს. უპირველეს ყოვლისა, მათგან ვისწავლე გულწრფელობა და უშუალობა. ბავშვები არასოდეს მალავენ ემოციებს და ეს მეხმარება უკეთ გავიგო მათი საჭიროებები. ასევე ვისწავლე მოთმინება და თანაგრძნობა. თითოეულ მოსწავლეს ინდივიდუალური მიდგომა სჭირდება და ამასთან შეგუება მეხმარება გავხდე უკეთესი მასწავლებელი და უკეთესი ადამიანი.“