1121 წლის 12 აგვისტოს, დავით აღმაშენებლის მეთაურობით, საქართველომ გაიმარჯვა დიდგორის ბრძოლაში, სადაც თურქ-სელჩუკების კოალიციური ლაშქრის წინააღმდეგ იბრძოდა.
13 აგვისტო 2025
ჩვენი ქვეყნის ისტორიაში ეს დღე „ძლევაი საკვირველის“ სახელით შევიდა. დიდგორის ბრძოლა საქართველოსთვის ერთ-ერთი ყველაზე დიდი გამარჯვება იყო.
ბრძოლის წინ დავითმა ლაშქარს ამ სიტყვებით მიმართა:
„ჩვენ ყველამ, ხელების ცისაკენ აპყრობით, ძლიერ ღმერთს აღთქმა მივცეთ, რომ მისი სიყვარულისათვის ამ ბრძოლის ველზე დავიხოცებით და არ გავიქცევით. და რათა არ შეგვეძლოს გაქცევა, კიდეც რომ მოვინდომოთ, ამ ხეობის შესავალი, რომლითაც შემოვსულვართ, ხეთა ხშირი ხორგებით შევკრათ“.
დავით აღმაშენებელი გენიალური სამხედრო სტრატეგი იყო. მან თურქ-სელჩუკების გამოცდილი სარდალი, ილ-ღაზი, აიძულა, ბრძოლა მიეღო იქ, სადაც თავის რიცხვობრივ უპირატესობას ვერ გამოიყენებდა.